Wa goş bidî mesajê Ocalanî

Sîyasetmedaran mezelê sîyasetmedaro Kurd Vedat Aydino ke amebi qetilkerdene zîyaret kerd. Hemserekê Şaredarîya Bajarê Girdî ya Amedî Selçûk Mizrakliyî mezelê Aydinî ser o qisey kerd. Mizrakliyî bale ant mesajê Ocalanî ser û wina: “Ganî herkes goş bido mesajê Ocalanî. Çimkî vengdayîşê Ocalanî destpêkê rayîrê heqîqete yo.”

Bi wesîleya Roşanê Qurbanan sîyasetmedar û keyeyî goristanan zîyaret kenî. Na çarçewa de Amed de parlamenterê HDPyî yê Amedî, îdarekarê partî û hemserekanê şaredarîyan mezelê Serekê Partîya HEPî Vedat Aydinî ke hetê JÎTEMî ra amebi qetilkerdene, zîyaret kerd. Keyeyê Aydinî, îdarekarê MEBYA-DERî û sîyasetmedarê kurdan zî beşdarê merasîmê vîrardişî bîyî.

Badê ke duayî ameyî kerdene, seba kesê ke têkoşînê demokrasî de şehîd bîyî rêz ame girewtene. Rêzgirewtişî ra dima Hemsereka HDPyî ya Amedî Hulya Alokmene qisey kerde û wina va: “Kurdî her roşan mezel yan zî zîndanan zîyaret kenî. Ganî êdî no nêbo qederê Kurdan. Ma vizêr senî ke aştîye waştêne, ewro zî wazenî û ma do seba ci têkoşîn bidî. Ma bawer kenî ke ameyoxê ma do hîna roşnêr bibo.”

Alokmene daye zanayene ke kesê ke canê xo feda kerdî, seba ke şarê bînî azade bicuyî, têkoşîn dayî û wina domnaye: “Seba ke Kurdî bi hawayo rûmetin bicuyî, xover da. Ganî ma seba xeyalanê înan bixebetyî. Seba ke xeyalê înan pê bêrî, ganî ma têkoşîn bidî.”

No şer wina dewam nêkeno

Kekoyê Vedat Aydinî Veysî Aydinî zî qisey kerd. Aydinî va ‘rojanê pîrozan de herkes goreyê bawerîya xo duayan keno’ û wina domna: “Ma wazenî ke wa êdî mergî nêbî û gonî nêrijîyo. Wa çareserîyêka aştîyane bibo. Wexto ke ma cografyaya xo ra ewnîyenî, şero ke 30 serrî yo dewam keno, esto. Reyna Vakurê Sûrîye û Başûr de şer esto, dagîrkerîye esta. Wina aseno ke dagîrkerî wazenî gonî birijnî. Wazenî îradeya şaran çin bikerî. Rojêka winasî de ez vana ke no şer wina dewam nêkeno. Ganî Rojhelato Mîyanên de problemê Kurdan bêro çareserkerdene. Çimkî heta ke problem çareser nêbo, şarî nêresenî huzur.”

Ganî mesajî rê bêveng nêmanî

Hemserekê Şaredarîya Bajarê Girdî yê Amedî Selçûk Mizrakliyî zî bale ante vengdayîşê Rayberê Şarê Kurdî Abdullah Ocalanî ke 7ê Tebaxe de bi rayîrê avûkatan kerdbi ser û wina va: “Ewro sere de Rojawan û xeylê cayanê bînan de rijnayîşêko gird esto. Heme ca de adir veşeno. Cok ra lazimîye bi dîyalog û muzakereyan esta. Lazimî bi averberdişê ziwanê çareserîye esta. Ganî goş bidî vengdayîşê Ocalanî. Çimkî no vengdayîş destpêkê rayîrê heqîqete yo. No het de gerek gamî berî eştene.” Qiseykerdişan ra dima qurnefîlî ronîyayî mezelê Aydinî ser. Sîyasetmedar û keyeyî roşanê yewbînan pîroz kerd û zîyaret qedêna.

AMED


Mesajê Ocalanî zaf muhîm o

Taqîbkaro Sîyasî Bûrhan Şêx Raûfî zî mesajê Ocalanî ser o qisey kerd û dîyar kerd ke eke Tirkîya goş nêdo mesajê Ocalanî do hetê mîyanneteweyî de zirarêko gird bivîno. Raûfî dîyar kerd ke Tirkîya û Rojhelato Mîyanên prosesêko hesas ra derbaz beno û prosesêko winasî de mesajê Ocalanî zaf muhîm o. Ocalan reya sifteyîne vengdayîşanê winasîyan nêkeno. Mesajê Ocalanî rîyê aştîye yê Kurdan nîşan dano. Ocalan wazeno problem bi dîyalogî çareser bikero. Eke Tirkîya û Erdogan goş nêdî mesajê Ocalanî, o wext hem do zere de û hem zî teber de zirar bivîno. Ez veng dana çar parçeyanê Kurdîstanî ke wa seba ke krîz û problem çareser bibî, hewl bidî. Wa dewleta Tirkî ser o zextan bikerî ke wa prosesê çareserîye dest pêbikero.”

Yazarın diğer yazıları

    None Found