Wa mergî nêbî û gamî bêrî eştene

Seba wedarnayîşê tecrîdî çalakîyê ke dîyaybî destpêkerdene bêmabên dewam kenî. Hunermendan vera tecrîdî de veng da hukmatî ke wa mergî nêbî gamî bêrî eştene. Hunermend Mîkaîl Aslanî va ‘wa ti kes nêmiro û mabênê hepsî û hukmatî de komîsyonêk bêro ronayene’.

ZEMO AGGOZ / MA / ANQARA

Seba ke tecrîdê serê Rayberê Şarê Kurdî Abdullah Ocalanî bêro wedarnayene, sere de Kurdîstan û xeylê cayanê bînan de çalakîyê grevê vêşanîye dewam kenî. Çalakîya grevê vêşanîye ke hetê Parlamentera HDP û Hemsereka KCDyî Leyla Guvene ra amebî destpêkerdene, roja 190. de dewam kena.

Heto bîn ra çalakîya Nasir Yagizî roja 187, ya hepsîyan roja 152, ya Îmam Şîş û 14 çalakwananê Strasbourgî roja 151, ya Yûsûf Îbayî roja 125 û ya Fadîle Toke zî roja 117. de dewam kena. Heto bîn ra hepsîyan ra 2 grûbê ke 30 kesan ra pê yenî, rojeyê mergî de yî. Reyna bitaybetî Ewropa de xeylê merkezan de çalakîyê ke destek danî grevanê vêşanîye, yenî viraştene.

Xeylê hunermendan grevê vêşanîye û rojeyê mergî ser o qisey kerdî û seba ke gamî bêrî eştene veng da raya pêroyî. Hunermendan ra Levent Uzumcuyî va ‘şima halê Tirkîya vînenî’ û wina domna: “Herkes hewl dano ke vengê xo bido eşnawitene û neheqîyan bido nîşandayene. Ti serdem qasê nê serdemî nêbîyo. Ez hêvî kena ke rindîyî bêrî, labelê tena bi hêvîkerdiş nêbeno. Tena bi Twîtter de nuştişî nêbeno. Ganî merdimî hewl bidî.”

Grevî seba edaletî yenî kerdene

Nuştox Umît Kivançî zî da zanayene ke o hêvî keno ke rojeyê mergî demêko raver biqedyî û va ‘ez nêwazena ti kes bimiro’. Kayker Berna Laçîne zî wina va: “Se beno wa bibo, eke grevê vêşanîye esto, o wext demek derdê merdiman esto. Ganî merdim înan goşdarî bikero û gaman bierzo.” Barbaros Şansalo karê modayî keno zî va ‘grevê vêşanîye seba dewleta tirkî şerm o’ û wina domna: “Eke wina şêro rîyê îqtîdarî ra do mergî bibî. Çalakwanî seba ke edalet bibo, grevê xo domnenî.”

Ganî tecrîd wedarîyo

Deyîrbaze û kaykera sînemayî Denîz Turkalî zî wina va: “Tecrîd teberê qanûnê ke hetê dewlete de ameyî ronayene de yo. Cok ra ganî demêko raver tecrîd bêro wedarnayene. No rezalet o.”

Hunermendan ra Mîkaîl Aslanî zî waşt seba ke çalakwananê grevê vêşanîye ra ti kes nêmiro, ganî hunermend û roşnvîrî demêko raver berpirsîyarî bigîrî. Aslanî wina va: “Wa mergî bêrî vindarnayene û waştişê hepsîyan nê roşnvîran ser o neqlê hukmatî bibî. Wa mabênê hukmat û hepsîyan de komîsyonêk bêro ronayene.”

Yazarın diğer yazıları

    None Found