Wazena şarê Başûrî teslîm bigîra

Hêzê Pawitişê Şarî derheqê hêrişanê dewleta Tirk a dagîrkere de eşkerayî daye û wina va: “Nê hêrişî bi hawayo sistematik û qestî yenî kerdene. Amancê nê hêrişan o yo ke şarî teslîm bigîrî û parçeyê dagîrkerîye yî. Cok ra ganî herkes vera nêyî de bêveng nêmano û xover bido.”

Dewleta tirkî demêk o hêrişê Xakûrkê keno û hewl dano Başûrê Kurdîstanî dagîr bikero. Heta nika xeylê dewî ameyî bombebardûmankerdene. Vera hewldayîşê dagîrkerîye yê dewleta Tirkî de sere de şarê herême û xeylê hetan ra reaksîyonî yenî.

Merkezê Îrtîbatê Çapemenîye yê Hêzê Pawitişê Şarî (HPG-BÎM) babete ser o eşkerayîyêka nuştekîye daye û mesajê muhîmî dayî. HPG-BÎMî eşkerayîya xo de dîyar kerdo ke vera qezencanê şarê Kurdîstanî de hêrişî dîyayî destpêkerdene.

HPG-BÎMî eşkerayî de vato ‘No zîhnîyeto ke hêrişê qezencanê şar û erjanê ma keno, wazeno Başûrê Kurdîstanî dagîr bikero’ û wina domnayo: “Dewleta tirk a dagîrkere bi destekê teknîkî bi hawayo qestî cayanê sîvîlan hedef gêna. Demok vîyarte de nimuneyê nêyî zaf î. Nê hêrişan ra yew zî 12ê Hezîrane de vera qezaya Amedîye ya Dihokî de ameye kerdene. Wextê bombevarnayîşî de ca, wesayît û îstasyonê neftî ameyî bombardûmankerdene. Netîceyê hêrişan de merg nêbîyo, labelê tayê kesî birîndar bîyî.”

Nê hêrişî parçeyê dagîrkerîye yî

HPG-BÎMî dewamê eşkerayîya xo de bale anto nizdîbîyayîşê dewleta Tirkî ser û wina vato: “Dewleta Tirk bi hawayo qestî cayanê sîvîlan hedef gêna ke merdiman bitersna û herême veng bikera. Nê hêrişê ke bi destekê wesayîtê bêmerdimî yenî kerdene de hemwelatîyê sîvîlî ameyî hedefgirewtene. Dewleta Tirkî wazena Başûrê Kurdîstanî bi temamî dagîr bikera û seba ke xoverdayîşê sey Şeladizê nêbî, hewl dano şarî bitersno. Nê hêrişî seba tersnayîşî yenî kerdene. Nê hêrişî parçeyêkê dagîrkerîye yî.”

Eke dagîrkerî nêbo, çî yo?

HPG-BÎMî eşkerayîya xo de vato ‘ma nê hêrişan ra fam kenî ke dewleta Tirkî kurdan rê tena merg û rijnayîşî rewa vînena û wina domna: “Seba nê hêrişan zî gerîlayanê Kurdîstanî sey mehne nîşan dana. Ma demo vîyarte de zî nimuneyê nêyî dî. Cayê ke qala ci yena kerdene de qet têgêrayîşê gerîlayanê ma çin o, ê cayê ke sîvîlî tede cuyenî yî. Nameyê nêyî eke dagîrkerî nêbo, çî yo? No zîhnîyet wazeno şarê Başûrê Kurdîstanî bitersno û teslîm bigîro. Wazenî zîhnîyetê qetlîyamkarî bi zûran padî.”

Gere her ware de xoverdayîş bibo

Peynîya eşkerayîya HPG-BÎMî de qala xoverdayîşo ke bêro dayene ameyo kerdene û eşkerayî wina qedîyayo: “Ganî vera nê hêrişê ke şarê Başûrê Kurdîstanî rê benî de her ca de xoverdayîş bêro nîşandayene û gerek ti kes vera hêrişan de bêveng nêbo. Amancê dewleta Tirk a dagîrkere o yo ke Kurdanê azadan qirkerdiş ra derbaz bikero. Coka gerek 4 parçeyê Kurdîstanî bibî yew û vera nê hêrişkarîye de têkoşîn bidî. Ma gerîlayê azadîye yê Kurdîstanî se beno wa bibo, do vera dagîrkeran de seba azadîya şarê xo têkoşîn bidî. Gerîlayê azadîya Kurdîstanî do hêrişanê dagîrkeran veng bivejo. Ma merdimê ma yê ke netîceyê hêrişan de birîndar bîyî rê şîfa wazenî.”

ANHA / SILÊMANÎ

Yazarın diğer yazıları

    None Found