Wazenî heyfê operasyonî bigîrî

7ê Êlule de polîs û cendirmeyanê tîmê taybetan qezayanê Nisêbîn û Omeryanî yê Mêrdînî de bi qoricîyan operasyonêk viraştbî. Wextê operasyonan de Mudirê Şûbeyê Mêrdînî yê polîsan Tûfan Kansûva merdbi.

Dima ra tayê taxanê Nisêbînî û Omeryanî de qedexeyê tebervejîyayîşê kuçeyan amebi îlankerdene. Dima ra muxtarê dewan amebî komkerdene û tehdîtkerdene. Dewijan dîyar kerd ke leşkerî hewl danî ke dewan bi zorî veng bikerî.

Ame musayene ke leşkerî şîyî berê tayê dewijan ver û înan ra vato ‘Nê cayan ra şêrê, neke beno ke heme çî bêro sereyê şima’. Leşkeran dewanê Metîna de 3 keyeyî bi no qeyde tehdît kerdo û her 3 keyeyî zî mecbûr mendî bar bikerî. Nê rojan de reyna têgêrayîşê leşkerî herême de dest pêkerdo.

Ma nêzanî ke se bikerî

Keso ke ewleyîye ver nameyê xo nêda, va ‘wextê pêrodayîşan de çîyo ke nêame sereyê ma nêmend’ û wina dewam kerd: “Xeylê kesî mecbûr mendî bar bikerî û şêrî. Ma bi aşman o ke tersî reyde cuyenî. Ti kesî hêgayê xo nêramito. Pêrodayîşî ra dima leşkerî dewe de gêrayî û herkesî tehdît kerdî. Ma nêzanî ke se bikerî. Ma ra wazenî ke ma dewa xo veng bikerî. Wazenî heyfê operasyonî bigîrî. Seba ke bêvengîye esta, nêyî dewam kenî.”

 JINNEWS / MÊRDÎN

Yazarın diğer yazıları

    None Found