Xeta Ocalanî pîyacuyayîşê şaran a

Parlamentera HDPyî ya Amedî Salîha Aydenîze dîyar kerde ke Rayberê Şarê Kurdî Abdullah Ocalan seba çareserîya problemanê Tirkîya û Rojhelatê Mîyanênî zaf muhîm o û wina domna: “Rayîrê hîrêyinî yê Ocalanî, xeta pîyacuyayîşê şaran o.”

OZGUR PAKSOY / MA / AMED

Vera tecrîdo ke Îmrali de dewam kerdêne çalakîyê grevê vêşanîye û rojeyê mergî amebî viraştene û Rayberê Şarê Kurdî Abdullah Ocalan 8 serrî ra pey şênabi avûkatanê xo dir pêvînayîşan bikero. Avûkatan pêro pîya 4 pêvînayîşî kerdî û mesajê ke hetê Ocalanî ra erşawîyayî rojeva Tirkîya bedilna.

Parlamentera Partîya Demokratîke ya Şaran (HDP) ya Amedî Salîha Aydenîze derheqê mesajê ke her çar pêvînayîşan de ameybî dayene de qisey kerd û fikrê xo pare kerdî. Aydenîze bale ante mesajanê çar pêvînayînayîşan ser û va ‘Ocalanî her çar pêvînayîşan de zî qala pêkerdişo komelkî, sîyaseto demokratîk, muzakereyo demokratîk û aştîya rûmetine kerda’.

Aydenîze daye zanayene ke Ocalan serra 1993î ra nata yo ke qala rayîro hîrêyin keno’ û wina dewam kerd: “Hertim gêrayîşê birêz Ocalanî yê çareserîya probleman estbî. Wexto ke ma demê nizdî ra ewnîyenî, serranê 2004 û 2005 de zî rayîrê hîrêyinî pêşnîyaz kerdbî. No rayîrê hîrêyin xorêxistinkerdişê komelî, waştişê bîyolojîk û fîzyolojîkî yê komelî yo.”

HDP goreyê rayîrê hîrêyinî awan bîyo

Aydenîze dîyar kerde ke ê hewl danî rayîrê hîrêyinî yê Ocalanî awan bikerî û wina va: “Awanbîyayîşê HDPyî zî seba nêyî yo. HDP partîyêka ke tena fikrêk ca gêno, nîyo. HDP goreyê fikrê rayîrê hîrêyinî yê Ocalanî ame ronayene. Ewro birêz Ocalanî HDP ra wazeno ke wa HDP goreyê fikrê awanbîyayîşê xo hereket bikero û dîyar keno ke hetê bînî yê komelî nêşênî îqtîdarî reyde problemanê xo çareser bikerî.”

Birêz Ocalan çareserîye de zaf muhîm o

Aydenîze qiseykerdişê xo de qala muhîmîya estena Ocalanî kerde û wina va: “Birêz Ocalanî vatbi ke 2 komelê ke bi seserran o ke pîya cuyenî, çend serranê peyênan de cîya bîyî. Awanbîyayîşê komare ra nata Kurdî raştê polîtîkayanê asîmîlasyonî ameyî û tena vatişê Tirkî vejîyayo aver. Bi no hawa hetê bînî çinî ameyî hesibnayene. Vera nêyî de birêz Ocalan alternatîfê rayîrê hîrêyinî nîşan dano. Bi no hewa fikrê HDPyî vejîya orte. Coka bire Ocalan çareserîya problemanê Rojhelatê Mîyanên û Tirkîya de zaf muhîm o û nêbo nêbeno yo.”

Bêxera pîyacuyayîşî sewbîna çare çin o

Aydenîze va ‘dewlete vera mesajê muzakere û Aştîya Rûmetine ya Ocalanî de şer esas gêna’ û wina dewam qedênaye: “Bi desan operasyonê teberê sînorî ke ma nameyê înan xo vîra kerdo, ameyî viraştene. Ê bi hawayo baş zanî ke bi nê operasyonan netîce bigîrî, labelê hîna zî israr kenî. Birêz Ocalan hem HDP rê hem zî Komara Tirkîya ra vano ke problemî ancax bi aştîya komelkî û aştîya rûmetine reyde çareser benî. Coka bêxera pîyacuyayîşî, sewbîna çareyê şaran çin o. Seba ke zemîno demokratîk awan bibo, ganî komel de wareyê ke yewbînan ra fam bikerî, bêrî awankerdene. Neke bi polîtîkayanê şerî, înkar û cîyakerdişî reyde netîce nîno girewtene.”

Yazarın diğer yazıları

    None Found