Xoverdayîş keno azad

SERKAN DEMÎREL / ANF / ZURÎH 

Rayberanê Tevgerê Cinîyanê Kurdan û PKKyî ra Sakîne Cansize, temsîkara KNKyî ya Parîsî Fîdan Dogane û Endama Tevgerê Ciwananê Kurdan Leyla Şaylemeze 9ê Çileyê 2013î de paytextê Fransa Parîs de amebî qetilkerdene. Semedê vîrardişê nê hîrê cinîyanê şorişgêran Swîsre de festîvala ke her serre yena viraştene, emser 16ê Hezirane de do bêro viraştene.

Festîvala ke rayberîya Yewîya Cinîyanê Kurdan ya Swîsre de bi siloganê ‘Xoverdayîşê cinîyan keno azad’ yena viraştene. Seba ke 14ê Hezîrane de Swîsre de Grevê Cinîyanê Neteweyîyî yena viraştene, festîvala emserî goreyê serranê bînan hîna muhîm a. Bi desan cinîyê ke organîzeyê festîvale de ca gênê, waştişê înan o yo ke xoverdayîşêko bi rengê cinîyan dinya de berz beno festîvale ramojnê.

Festîvala ke 16ê Hezîrane Kasernenarealê Zurîhî de yena viraştene amadekarîya programê ci temam bîyo. Festîvale de hetêk ra Jineolojî, derheqê babetanê cinîyan de xeylî panel û semînerî, hetêk ra zî aktîvîteyê kulturî û hunerî do bêrê viraştene. Reyna çadira otantîke ya Kurdî de kulturê Kurdan do bêro şinasnayene û denbejî deyîranê xo vajê. Semedê domanan zî do aktîvîteyê taybetî bêrê viraştene. Projeyê JINWARî ke Rojawan de ameyo awankerdene do o zî bidîyo naskerdene. Festîvale de do hunermendê sey Pinar Aydinlare, Nûarîne, Zhala Share, Kimgo Sasa vejîyê sehne û ekîbê kulturanê cîya-cîyayan ê reqis û folklorî zî festîvale de ca bigêrê.

Waştişê heme cinîyan yew o

Temsîlkaranê Tevgerê Cinîyanê Kurdan ra Medya Botane bale ante xoverdayîşê cinîyan ser û wina va: “Rayberîya Leyla Guvene de xoverdayîşêk ame dayene û ser kewt. Ruhê nê xoverdayîşî do morê xo bido Festîvala 16ê Hezîrane ro. Hetê bînî ra zî 14ê Hezîrane de Swîsre de Grevê Cinîyanê Neteweyîyî yeno viraştene. Na çalakîye vera nêheqîya ke cinîyan rê yena kerdene de serewedartiş o.  Organîzekerdişê na çalakîye de ma cinîyê Kurdan zî ca gênê. Xeylî sazîyê cinîyan ê ke na çalakîye organîze kenê, organîzekerdişê Festîvala Sakîne Cansize de zî ca gênê. Ma eşkenê vajê ke waştişê heme cinîyan yew o. Heqê heme cinîyan yenê binpaykerdene û vera naye de ma vanê ke reng, ziwan û nasnameyê ma cîya bî zî têkoşînê ma hempar o, ganî hempar bo. Festîvale do bi nê ruhî bêro viraştene. Bi vatişê kilmî ma cinîyî zanê û vanê kê;  xoverdayîşê cinîyan keno azad.”

Yazarın diğer yazıları

    None Found