Zîndanan de zilmê AKP rameno

Pêroyîya hepisxaneyan de verê ra nata tim zext û neheqîyî estbî û qet kêmî nêbîyî. Bitaybetî teşebusê derbe ra dima hepisxaneyan de zext, hêriş û îşkenceyî her ke şono zêde benî. 

Nê hepisxaneyan ra yewe zî Hepisxaneyê Tîpa E yê Mêrdînî yo. Hepsîyî dîyar kenî ke teberê sehnayîşê rutînan de hêrişê rewşa îstîsnayî estî, her roje ancax 3 saetan eşkenî bivejî cayê helmgirewtişî û ewja de zî leşkeri estî. Reyna koguşê cinîyan de zî eynî hawa hêriş û zextî estî. Heta nika 15 cinîyî ameyî surgunkerdiş. 

Neheqîyê qat bi qat zêdeyêr î

Serekê Komeleya ÎHDyî yê Şûbeya Mêrdînî Erdal Kuzuyî babete ser o qisey kerd. 

Kuzuyî va ‘roja OHAL kewto dewre ra nata Tikîya de heqê merdiman orte ra wedarîyayo’ û qiseykerdişê xo wina domna: “Bi îlankerdişê OHALî êdî merdim nêeşkeno mekanîzmaya huqûqî bido xebetnayîş. Muracatê rayîranê huqûqîyan de merdim etiryeno û no het de problemê estî. Neheqîyê ke serranê 90î ra qat bi qat zêdeyêr î, yenî cuyayîş.”

 Heta nika çîyêk nêameyo kerdiş

Kuzuyî dewamê qiseykerdişê xo de bale ant nêabîyayîşê doze û tehqîqatan û qiseykerdişê xo wina qedêna: “Çîyêko ewro yenî cuyayîş, demo veren ra hîna giranêr î. Çîyo tewr xirabin no yo ke nika mekanîzmayêka huqûqî ya kontrolkerdişî çin a. Muracatê ke merkezê ÎHDyî rê yenî kerdiş zî nîşanê ma danî ke neheqîyî xeylê zêde yî. Seba ke kontrolkerdişêko bêhet çin o, neheqîyan ver çîyêk nîno kerdiş. Her çiqas ke ma muracatê çend dozgerîyan kerd zî heta nika çîyêk nêameyo kerdiş.” 

 ŞÛJIN / MÊRDÎN

Yazarın diğer yazıları

    None Found