Bi nameyê Kurdistan şerab heselnena

Karsazo Kurd Faysal Taşkirin nê 33 serrê ke Fransa de cuya keno û bi nameyê ‘Kurdistan’ de zî şerab heselneno. Babete ser o Taşkiran wina vat: “Min rojêk yew guşeyê engure dî, nê şeklê guşeyî zî min de fikrêk xelq kerd. Resmê guşeyî sey xerîtaya Kurdistanî bî û min peynî vat qey bi nameyê Kurdistan çikêk nêbo, ez eşkena bi nameyê Kurdistanî markayê şerabî hesel bika, no zî do çikêko bi qiymet bibo. Bi no rayîrî Kurdistan do heme banan ra bikewo.”

Ma lîsansê ci girewt

Goreyê xebera ajansê Rudawî, Fransa welatêke bi şerabê xo namdar a, Taşkiran zî wazena na namdarîya Fransa ra kar bivîna û têkoşîn dano ke heme şerabhesan ra şerabê Kurdistanî biresno. Taşkiran wina domna: “Projeyê ma hîna qonaxeko sere de yo. Ma lîsansê ci girewt, ma nika ra 5 hezar sîparîş zî ma girewt, nêzdî 20 hezar rezervê ma estê. Xo ra kapasîteyê ma yê heselî encax 100 hezarî yo la ma do hîna bi zaf bikê.”

Taşkiran wazeno tewir bi tewir rengan de şeraban hesel biko, demê heselkerdişê şeraban de wazeno engurê Kurdistanî zî bişuxilno û no ser zî Sazîya De LA Nationî yê Fransa ra hetkarî wazeno. Serekê Sazîya De LA Nationî yê Fransa zî babete ser o wina vano: “Armancê ma kesê ke newe karî ra destpê kenê înan ra hetkarîdayiş o, ma taybetî babeta rotişî de hetkarî danê.” MERKEZÊ XEBERAN