Dewleta Tirkî fosforo sipî û napalm bikar ardî

Endama Heyetê Caardişî yê TEV-DEMî Foza Yûsife derheqê hêrişanê vera Rojawanî de qisey kerd û dîyar kerde ke qerarê adirbirnayîşî hem hetê QSDyî ra hem zî hetê îdareyê herême ra sey gamêka seba qedênayîşê qirkerdişî ame destgirewtene. Yusifê daye zanayene ke Îdareyo Xoser wazeno ke her tim meseleyan bi rayîrê dîyalogî çareser bikero.

Foza Yûsife qiseykerdişê xo de qala hedefgirîyayîşê sivîlan kerde û wina va: “Serêkanîyê û Girê Spî de zaf sivîlî ameyî qetilkerdene û sucê şerî ameyî kerdene. Seba ke verê naye bêro girewtene, gamêka winasî ameye eştene. Herçiqas ame zanayene ke dewleta Tirkî goreyê ci hereket nêkerdo zî, ma goreyê ci hereket kerd û çi ame waştene ma ard ca. QSDyî şertî ardî ca la dewleta Tirkî hêrişanê xo rê dewam kerd û kena. Dewleta Tirkî bi adirbirnayîşî waşte ke kiştişê sivîlan binimino û hem zî tedaya Amerîka û tedaya raya pêroyî ya serê Trumpî sist bikero. Şar bîyo koçber. Bi se hezaran kesanê ke Girê Sipî û Serêkanîyê ra koç kerdî, kampan de ameyî bicakerdene.”

Foza Yûsife va ‘îzehetê Trumpî vernîya qirkerdişî akenê’ û wina dewam kerde: “ Ganî ma bi garantorîya mîyanneteweyî de abigêrê keye û cayanê xo. Neke qirkerdişî do bibê. Aşkere yo ke sîlehê Erdoganî vera doman û cinîyan de yenê bikarardene. Nika DAÎŞ bi nameyêko bîn cayê xo gêno. Ê sere de Kurdan û her kesî sey dişmenî vînenê. Keyeyê şarî rijnenê, dest nanê keyeyan ser. Roja ewile ra nata sucê şerî ameyî kerdene. Fosforo sipî û napalm ameyî bikarardene. Derheqê nê sucan de ma dosyayî amade kerdî, komîsyonêk ameyo sazkerdene. Ma do têkoşînê xo yo huqûqî bidomnî. Senî ke ma heqê xo yo meşrû anê ca, wareyê pawitişê huqûqî de zî ma do têkoşînê xo bikerê.”

ANF/BRUKSEL