Dewleta Tirkî hêrişê cayanê firazan kena

Dewleta Tirkan a îşxalkere ya ke cergeyanê xo reyde 9ê teşrîna verêne de hêrişê Vakur û Rojhelatê Sûrîye û bi taybetî hêrişê Serêkanîye kerd, zaf cayan de bawerîyan kena hedef.

Hêrişê Dewleta Tirkan ê vera Rojawanî dewam kenê. Cayê fîrazî yê sivîlan û warê înan yenê bombavarnayene. Wextê hêrişanê îşxalkerdişê Efrînî de amebî dîyene ke Dewleta Tirkan hêrişê cayan ê fîrazan zî kena. Nika zî merkezê bawerîyan ê Dirbesîye bi hedefê hêrişan. Dêra Asûrîyan a ke sey dêra kahane yena şinasnayene û Mizgefta Dirbesîye ya Pîle zî tede warê sivîlan yenê bombavarnayene.

Yûsif Xelîl Silêmanî wexto ke topê hawanî ginaybî keyeyê ey ra zî keyeyê xo nêteriknayo. Yûsif Xelîl Silêmanî vat: “Armanco bingeyên yê nê hêrişî no yo ke ma erdê xo biteriknê. Na şewe saete 10 de topê hawanî kewtî keyeyê mi ser. Armancê Dewleta Tirkan no yo ke şar herême ra veja. Bi nê hêrişan ê nêeşkenê ma erdê ma ra vejê. Eke ma bimirê ma do erdê xo ser o bimirê.”

ANHA/DIRBÊSÎYE