Ganî herkes goş bido Îmrali

Parlamentera HDPyî ya Îzmîrî Serpîl Kemalbaye pêvînayîş û mesajo ke Îmrali ra ame ser o qisey kerde û wina va: “Ê ke wazenî Tirkîyayêka demokratîke awan bikerî, ganî goş bidî nê vengî. Heta ke kurdî nêbî çîyêk nîno kerdene û çareser nêbeno zî.”

Rayberê Şarê Kurdî Abdullah Ocalan 8 serran ra dima avûkatanê xo reyde 2 û 22ê Gulane de 2 pêvînayîşî viraştbî û mesajê muhîmî dabî. Verfekê Kongreya Demokratîke ya Şaran Sedat Şenogluyî pêvînayîş û mesajê Ocalanî ser o qisey kerd.

Şenogluyî va ‘pêvînayîş zaf muhîm bi’ û wina domna: “Ganî tesilî dewamê nê pêvînayîşan bêro. Dewlete 8 serrî teberê huqûqî de hereket kerd. No proses de xeylê çîyî ameyî cuyayene. Bi nê pêvînayîşan tecrîd yewna rey teşhîr bi. Çîyo ke yeno waştene pêşnîyazê Ocalanî biresî şarî û Ocalan rolê xo kay bikero.”

Şenogluyî bale ant mesajê Ocalanî ser û wina va: “Mabênê serranê 2013-2015î de çîyê muhîmî bîbî. O wext deklarasyonêk amebi weşanayene. Labelê dewlete masa qelibnaye û şer da destpêkerdene. Ocalanî mesajê xo yo peyên de qala ‘kûrbîyayîş’î kerd. No zî yeno manaya ‘wa şar prosesî taqîb bikero’. Ocalanî mesajê xo de nîşan da ke o zaf muhîmî dano manîfestoya 2013î û bale antbi ewja ser. Pêvînayîşan de ame dîyayene ke muxatab tena Ocalan o. Ganî hêzê muxalefetî rolê xo kay bikerî.”

Zaf kar keweno milê ma ser

Şenogluyî da zanayene ke heta ke problemê kurdî çareser nêbo, Tirkîya de ti problem çareser nêbena û wina va: “Ganî komel goş bido nê pêşnîyazan. Eke komel wina bikero, masa rewa rew nêqelibîyena. Labelê no prosesêko zehmet o. Labelê ma hertim dî ke wexto ke Ocalan vengê xo resneno komelî, no hîna rehet o. Zaf kar keweno milê ma ser. Têkoşîn nika ra pey dest pêkeno.”

Îqtîdarê faşîstî tepîya game eşte

Parlamentera HDPyî ya Îzmîrî Serpîl Kemalbaye zî mesajê Ocalanî ser o va ‘grevê vêşanîye bi hawayo serkewte qedîyayî û no zî komel de kêfweşîyêk viraşt’ û wina domnaye: “No proses de 8 kesî şehîd bîyî. Çîyo ke lazim bi muxalefet bikero, ganî heta ke şehadetî nêbîbî, bikewtêne dewre. Helbet merdim nêşêno vajo tecrîd wedarîyayo û heme problemî çareser bîyî. Labelê no proses de îqtîdarê faşîstî tepîya game eşte.”

Heta kurdî nêbî çîyêk çareser nêbeno

Kemalbaye dîyar kerde ke mesajo ke Îmrali ra ame zaf bimana bi û wina dewam kerde: “Mesaj de herçiqas ke tay çîyî nuşte bî zî, zaf çîyan îfade kerdêne. Mesaj bi sebeb ke reyna sîyaset bêro qiseykerdene û mesaj de bale ancîyaye ser prosesê 2013 û 2015î ser. Vengêko Îmrali ra vejîyeno, her hetan mîyan de yeno munaqeşekerdene. Ê ke wazenî Tirkîyayêka demokratîke awan bikerî, eşkenî goş bidî nê vengî. Heta ke kurdî nêbî çîyêk nîno kerdene û çareser nêbeno zî.”

AMED