Hemparê munafiqê zalimî mebê

Endamê Komîteya Şaran û Bawerîyan a KCKyî Cîhan Erenî va ‘roşan kulturo cimatkî yo û ruhê ci de parekerdiş esto’ û wina domna: “Nizdîbîyayîşê Erdoganî yê vera Kurdan de munafiqîye ya. Tena rexnekerdişê ey nêbeno. Ganî vera zulmê ey de bêro vindetene.”

ERDAL TOLHILDAN / ENES YILDIZ / ANF / BEHDÎNAN

Endamê Komîteya Şaran û Bawerîyan a KCKyî Cîhan Erenî bi wesîleya Roşanê Remezanî qisey kerd û qiseykerdişê xo de xeylê babetan ser o vindet. Erenî qiseykerdişê xo de bale ant manaya roşanan ser û da zanayene ke roja ewroyine de munafiqîye hakim a.

Erenî destpêkê qiseykerdişê xo de şexsê dayîkanê laçigsipîyan de roşanê Kurdan û heme Muslumanan pîroz kerd. Erenî va ‘roşan kulturo cimatkî yo ruhê ci de hem madî hem manevî parekerdiş esto’ û wina domna: “Çi heyf o ke ewro ne Tirkîya, ne Rojhelato Mîyanên de şayîya roşanan çin a. Şexs û grûbê ke vanê ma Musluman ê, binê nameyê dewlete de şarî rê zext û neheqîye kenê. Bitaybetî zî AKP Îslamî şuxulneno. Xo bi naye weye keno.”

Erenî dewamê qiseykerdişê xo de wina va: “Vanê ma dîndarê la goreyê Îslamî tê nêgêrenê. Menga pîroze de bi hêrişê polîsan ê vera dayîkanê laçigsipîyan ma no reyna dî. Îxtîmalo gird o ke înanê ke talîmatê hêrişî dayêne û polîsanê ke hêrişê dayîkan kerdêne roje tepiştêne. Ganî cimatê Musluman naye bizanê dînê serdestan û nêçaran yew nîyê. Şar, nêçar, bindest û serdestî Hz. Mûhammed ra zî heman çî fam nêkenê. Îslam de roje sembolê aştî û way-biratîye yo. Roşan yeno manaya edalet û paştdayîşî. Îslam de guneyo tewr gird zûre ya. Alemê Îslamî de serdestî bi zûranê girdan cimatî xapînenê. Serdestî vatiş de dîndar ê, kerdiş de vera dînî de yê. Goreyê Îslamî nê munafiq ê. Çi heyf o ke ewro xeta munafiqan hakim a. Ma nê şexsê Erdoganî de vînenê. Xeylî gune û sûcî bi tobekerdiş efû bene, la efûyê munafiqîye çin o.”

Erdogan sey Fîravûn û Nemrûtî yo

Erenî bale ante hêrişê îqtîdarî yê serê Kurdan û wina dewam kerd: “Nizdîbîyayîşê Erdoganî yê vera Kurdan de munafiqîye ya. Vano ‘Way-birayê mi yê Musluman’ û qetil keno, ziwanê ci qedexe keno, dest nano serê şaredarîyanê ci, extîyaran erzeno zindan, dayîkê pîrê ke roje yê înan rê zulm keno. No munafiqîye ra zî wet o. Erdogan sey Fîravûn û Nemrûtî yo. Tena rexnekerdişê ey nêbeno. Ganî vera zulmê ey de bêro vindetene. Muslumano ke rêça Erdogan de şino ganî çimê xo abikero û na raştîye bivîno.”

Patşdayîşê AKPyî paştdayîşê munafiq û gunekarî yo

Erenî peynîya qiseykerdişê xo de wina vano: “Bitaybetî zî Muslumanê Kurdistanî wa bizanê ke vera înan de yew zalim û munafiq esto. Bi paştdayîşê AKPyî gune mekê. Patşdayîşê AKPyî paştdayîşê munafiq, zalim û gunekarî yo. Ez nê, Quran wina vano. Xora kam binê zanayîşê ci ê dînî esto, naye zano. No problemê cimatî, wîjdanî û ehlaqî yo. Muslumanê kurdistanijî mecbûr ê ke vera naye de tewir bigê. Qetilkerdişê qijanê ma sey îbadetî vînenê. Vera ma de zalimêk esto ke bi Sureya Fetîhî dagîrkerdişê welatê ma bimbarek hesibneno. Şima nêeşkenê hemparê nê bê. Eke ma wazenê roşanî bi raştî pîroz bikerî, ganî verê ci ma problemanê xo çareser bikerê. Peymeyê bingeyên ê Îslamî vera zulmî de xoverdayîş o. Îbadeto tewr pîl no yo.”