Her cayê laşê ey ra gonî yenî la tehlîye nêkenê

HAMDULLAH KESEN / MA /ANTALYA

Goreyê agahîyê 2019î yê Komîsyonê Hepixaneyî yê Merkezê ÎHDî, hepisxaneyan de nika 3 hezar 333 hepsê nêweşî estî, mîyanê înan ra rewşa 457 hepsê nêweş giran o. Devrîm Ayik seyî ra 76 astengdar o û nêweşîya CHRONî ci de esto la hema zî serbest nêameyo veradayiş.

Babete ser o Vervatoxê Komîsyonê Hepixaneyî yê Merkezê ÎHDî Îlhan Ongor vat ke şaxa înan hepisxane de Devrîm Ayik reyde pêvînayiş kerda, nêweşîya ey ser o laşe ci de her ca ra gonî rijyeno û wina vat: “Nêweşîya ci ser o nika nêeşkeno bi ser xo cuye biko, astengdarîya ey seyî ra 76 o. Ayik ra Unîversîteya Akdenîzî de dermankerdişo taybet kerdî la peynîya tepiştişê neweşîya ey hewna aver şîyo.”

Bê dermankerdiş tepa ardî

Vervatoxê Komîsyonê Hepixaneyî yê Merkezê ÎHDî Ongor dîyar kerd ke seba ke weşîya ey giran bîyo berdî nêweşxane la mudaxeleya cendirmeyî ser o bê dermankerdiş tepa ardî û wina dewam kerd: “Na babete ser o nêweşxane ra nuşte ameyo nuştiş, nêweşxane komela ma ra nuşteyê xo de vato ke nêweş ataxê aqutî derbas nêkerdo la ma zanenî ke ataxê aqutî derbas keno. No tablo zî nîşan dano ke kesî ke beşdarê grevê vêşanî ra beşdar bîyî, eynî zilm înan ra zî bêro kerdiş. Taybetî demo peynî teda û zilm ser o zaf kes ser piro ma kerdî la Wezaretê Edeletî goşanê xo pada yo. Serra 2019î de 50 hepsê nêweş cuya xo dayê.”

Ongor bal ont bi îmzayê serbestmendişê qetilê Qirkerdişê Sêwasî Ahmet Turanî û wina qedîna: “Serekkomar qetilê Sêwasî extîyarî ser o efû kerd. Nika hepisxaneyan de bi seyan hepsê nêweş estî, nêeşkenî bi ser xo cuye bikê la bi aşkera cîyakerî kenî. Ma veng Wezaretê Edeletî danî ke hepsê nêweş bêrî serbestveradayiş.”