Hunermendek ji zarokan re

  • Jackie Morris jineke ruh û huner ciwan e. Ew kitêban ji zarokan re dinivîse û xêz dike. Di xêzên wê de jî hêzeke efsûnê xwe dide der ku hem ji reng û xetan û hem jî ji xeyala wê peyda dibin.

Jackie Morris hunermend, nivîskar û xêzkera kitêbên zarokan e. Ew li Galiyayê karê xwe dike. Ev jina 59 salî hê jî têra xwe çalak e û ji bilî kitîbek diduyên ew dinivîse û ji bo wan xêz dike, ew ji bo gelek kitêbên din jî xêz dike. Wê par xelata Kate Greenaway Medal sala 2019´an ji bo xêzkirina xwe ya bi navê “The Lost Words” wergirt ku ji bo kitêba bi heman navî ya Robert Macfarlane çêkiribûn. Ev kitêb sala 2016´an weke kitêba herî bedew ji aliyê kitêbfiroşên Meliktiya Yekbûyî ve hat hilbijartin. Ew di nivîskarî û xêzkirina kitêbên zarokan de weke hunermendekê kar dike. Jixwe wê Xelata Tir na n-Og a ji bo kitêbên zarokan jî wergirtiye.
Jackie Morris li Ingilistanê li bajarê Birminghamê sala 1961´ê hatibe dinê jî, ew niha li Galiyayê dimîne. Di zaroktiya wê de jê re gotibûn, tu nikarî bibî hunermend, lê wê xwe fêrî xêzkirin û wêneçêkirinê kir. Çawa ku zanîngeh qedand jî li edîtorî û wênexêzkirina Radio Times, New Statesman, New Society û Country Living xebitî. Lê wê berê xwe da hunerê xêzkirina ji bo kitêbên zarokan. Ew bû dildara vî karî û kitêbên bedew ji bo zarokan çêkirin. Yek ji van Something About a Bear (Tiştek li ser hirçekê) bû. Bi vê kitêbê ew ji bo xelata Kate Greenaway Medal weke namzet hat nîşandan.

Kitêba peyvên wenda
Di xêzên wê de hem ji ber xet û rengên ew tercîh dike û hem jî ji ber xeyala wê tesîreke efsûnî heye. Ha ew tesîr jî dike ku ew bê naskirin û qebûlkirin. Kitêba wê û Robert Macfarlane ya bi navê The Lost Words (Peyvên wenda) bi xêzkirinên wê derçû. Di kitêbê de gotinên ku Ferhenga Ciwanan Cambridgeê kêm cih dide wan yan jî cih nade wan; nexasim jî gotinên herêmê û yên teknîkî. Ev yek jî encama alternatîfeke li dijî Ferhenga Ciwanan Cambridgeyê bû. Kitêbfiroşên Meliktiya Yekbûyî sala 2016´an ev kitêb weke ya herî bedew a wê salê hilbijart.
Sala 2017´an bi xêz, helbest û naveroka kitêbê pêşangehek hat vekirin û ev pêşangeh bi organîzasyona Muzeya Foundling li Londonê, Inverleith House li Edinburgh, Muzeya Royal Albert li Exeterê û Galeriya Huner a North York Moors National Park a li Danby li seranserê meliktiyê geriya.
Kitêb bi zimanê devara Jackie Morris lê dimîne jî derçû yanî bi Galî: ‘Geiriau Diflanedig’; di vê versiyonê de nivîskara Galiyayî Mererid Hopwood şiirên ji bo rastnivîsa peyvan ên di kitêbê de adapteyî Galî kirine, lê xêzkirinên Jackie Morris weke xwe di kitêbê de ne.

Berhemên wê
Hunerê wê ji berê de ji bo kitêbên zarokan hatiye ecibandin. Ji ber wê jî wê sala 1997 ji bo kitêba Cities in the Sea (Bajarên di deryayê de) û sala 2005´an jî ji bo The Seal Children (Zarokên fokan) Xelata Tir na n-Og wergirt.
Lê ew ne tenê bi xêzkirina ji bo kitêban jêhatî bûye; kitêbên wê The Snow Leopard (Leoparê berfê – 2007), Tell Me a Dragon (Ji min re behsa ejderekî bike – 2009), The Ice Bear (Hirça qeşayî – 2010), Queen of the Sky (Melîkeya ezmanan – 2011), I am Cat (Ez kitikek im – 2012), East of the Sun, West of the Moon (Ji rojê rojhilattir, ji heyvê rojavatir – 2013), Something About a Bear (Tiştek li ser hirçekê – 2014), The Wild Swans (Qûyên berî – 2015), The While Fox (Roviyê amade – 2016), The Lost Words (Peyvên wenda – 2017; tevî Robert Macfarlane) û gelekên din. CARDIFF