Newroz reyna tarîx nuşt

Newroz vizêr çehar leteyanê Kurdistan de bimbarek bî. Bi se hezaran Kurdî û dostê ci yê ke vejyay meydanan vera dehaq û dîktatoran mesajê xoverdayîş û serkewtişî day. Bimbarekîna bi heybet zey her serr emserr zî Amed de virazîya. Amed de vizêr bi se hezaran kesî amey têhet û slogana ‘Bicuwe Serok Apo”, “Bicuwe Newroz” berz kerdî. Amedijî seatanê sodir ra tepya herikyay meydanê Newroz.

Kesê ke protokol de ca girewtî, pêro piya kewtî qadî. Hemşaredarê Mêrdîn ke wezîfe ra ame dûr vistiş Ahmet Turk, Verfekê HDP Osman Baydemîr, Hemverfekê HDK Onur Hamzaoglu, Hemseroka KCD Leyla Guven, Aktivîsta TJA Ayşe Gokkan, Seroka EMEP Selma Gurkan, Hemserokê KESK Lami Ozgen, Hemserokê ÎHD Ozturk Turkdogan, Parlementerê HDP, cinîya Hemserokê HDP Selahattîn Demîrtaşî Başak Demîrtaş, Warzaya Rayverê Şarê Kurd Abdullah Ocalan’î Dîlek Ocalan, malbatê şehîdanê xoverdayîşê Cizîr, Sur, Nisêbîn, malbatê tepişteyanê sîyasî protokol de cayê xo girewtî. 

Zilmê dehaqan do biqedîyo

Bimbarekîn bi vindertişê hurmetî û wendişê “Çerxa Şoreşî” destpa kerd. Dima ra ser nameyê Komîteyê Hadreyîn yê Newrozî Rûken Akça qisey kerd û Newroza şaran bimbarek kerd. Akça aşkere kerd ke cografyaya Kurdistan, xeylê reyî şahîdîye zilmê zalimanê zey Dehaq û Saddam’î kerd û va, ‘la şaran her tim bi xoverdayîşê xo Dehaq, Saddam û pîyakaranê ci têk berdo. 

‘Ma nika ra serkewtî’

Dima ra Hemseroka KCD Leyla Guven qisey kerd û veng da Serokê PDK Mesût Barzanî ke îtîfaqa bi AKP ra fek verado. Guven persa ‘şima dê heta çiwext zey kole bicuwe’ kerd û va bêrê îtîfaqê xo virazê. Guven va, ‘Ma dê Newroza xo bikirêşnê 16ê Nîsane. Ma nika ra serkewtî.’

Hemverfekê HDK Onur Hamzaoglu’yî zî qisey kerd û vera faşîzmî hayr ant îtîfaqê şaran ser.  

 Ahmet Turk ke tewrê bimbarekîn bi zî raştê eleqeyekê gird ame. Turkî aşkere kerd ke bedelê ci çi beno wa bibo, iyê dê bi sereberz vinderê. Turkî veng da hikûmet û va, ‘Bêrê çarçoveyê fikrê ke Birêz Ocalanî Newroza 2013 de vistî werte de raya haştî û dîyalogî akerê. Nayî ra bîn ray çin a. 

Newroz omidê şaran a 

Parlementera HDP yê Riha Dîlek Ocalan zî ser nameyê pawitox û  malbata Ocalan’î mesajêk wend, Newroz pêrokîn şaran rê bimbarek kerd. Qiseyê Dîlek Ocalan bi sloganê “Bicuwe Serok Apo”, bi çepik û tilîlîyan birnîyay. Ocalan va, “Newroza Amedî omidê şaran a. Newroza 2017î do bibo Newroza azadî û haştîye şaran. 

Şima kefenê  zilmî dirna

Verfekê HDP Osman Baydemîr ke xîtabê şarê Amedî kerd zî wina va: “Ey şarê Amed, şima fina da bîn serkewtî. Coş û wayîrvejyayîşî şima, kefenê zilmî bi nengû û zerya xo dirna. Seba îxtîdarê xo haştî kerdî qurban. Ma reyna veng danê Enqera û aqlê dewlet: “Şima senî ke maseyê muzakere wedarna, şima senî ke hewl da bi şîdet û zextî netîce bigîrê, şima senî ke bi MHP û Ergenekon îtîfaq rona, her cayê welatî çarnîya cayê adirî.”

Baydemîr’î peynî de aşkere kerd ke na ray ray nîya û va, ‘Amed şerî rê vano ‘Nê’. Şima se kenê bikerê nê meydanî dê azadî ra fek nêveradê.  

Bernameyê kulturî yê bimbarekîna Newroz de Koroyê Cinîyan yê Amedî, Koba Dengbêjanê Botan, Koma Pel, Yaşar Kur,  Ferhat Mansurî, Grup Mûnzûr’î zî vejyay ser sehne û bi muzîk û klamanê xo şêligî coşnay. 

Tenya Amed de nê, xêlê sûkanê Vakûrê Kurdistanî yê zey Semsûr,  Dîlok, Colemêrg, Dersim, Çewlîg, Êlîh, Agirî, û Sêrt de zî Newroz hetê des hezaran amê pîroz kerdiş. 

DÎHABER/AMED