No roşan de zî goristanê bêkesan de yê

Kurdistan de cenazeyê bi seyan kesanê ke qedexeyê tebervejîyayîşê ke 24ê Temuza 2015î de ameyî destpêkerdene, hetê dewlete ra ameyî qetilkerdene goristananê bêkesan de yê. Dewlete bi waştişê merdeyan ra qesasgirewtişî dest nayo meyîtan ser.

16ê Tebaxa 2015î ra heta 1ê Hezîrana 2017î Amed de 127, Mêrdîn de 32, Colemêrg de 20, Şirnex de 13, Bedlîs de 8, Êlîh de 3, Mûş de 4, Çewlîg de 5, Dêrsim de 5 û Xarpêt de yew rey pêro pîya 10 bajaran û tewr tay 43 qezayan de bi hawayo fermî tesbît kerde tewr tay 218 reyî bêdem û heme roje qedexeyê tebervejîyayîşî ame îlankerdene.

Nê qedexeyan de hêrişê hêzanê dewlete de bi seyan kesî ameyî qetilkerdene û cenazeyê înan rixmê muracatê merdimanê înan nêdîyayî. Cenazeyî bajaranê cîya cîyayan de goristananê bêkesan de yê. Hetê bînî ra Dewa Oleka Jorî ya Bedlîsî de Goristanê Garzanî gorî ameyî weşanayene û 267 cenazeyî ameyî remnayene û nînan ra 265 cenazeyî 19ê Kanûna 2017î ra Sazîya Tibê Edlîyî yê Stenbolî de yê. Nê roşan de zî bi seyan cenazeyî Qûran û dûayan ra mehrûm ê û merdimê înan reyna bi hesreta gorêk kewenê roşan.

MA / AMED