Partîyê Sosyalîst: Weşîya şarî ra qeyim derbe ya

Şaredarîyê HDPî ra tayînkerdişê qeyîmî ra partîyê sosyalîst bertek nîşan dayê û aşkera kerdê ke wezîfeya şaredarîyan şarî ra xîzmet a la nika şaredarîyan bîyê sey qeraqol û vatî ke qeyim hem îradeya şarî ra hem zî weşîya şarî ra derbe ya. 

BERÎVAN ALTAN

MA/ENQERE

Şaredarîyê Êlih, Erxanî, Farqîn, Licê, Gêl, Norşîn, Gokçebag û Halfelî ke rayberîya înan HDPî de bîyê, cayê hemserekan hetê îqtîdarê AKP û MHPî ra qeyim ameyê tayînkerdiş. Tayînkerdişê qeyimî ra partîyê sosyalîst bertek nîşan dayê.

Hetkara Sereka Pêroyina EMEPî ra Şukran Dogan vat ke AKP bi polîtîkayê qeyimî îradeya şarê Kurd çin hesibneno, nika pêroyina rojdemê Dinya û Tirkîya de vilabîyayişê Vîrûsê Koronayî (Covîd-19) esto û wina vat: “Dîyar beno ke rojdemê AKPî de no vîrûs çin o, AKP firsatkarî keno. Îradeya şarî çin hesibneno, no zî nîno qebulkerdiş. Heme nê teda û zilm nîşanê rejîmê yew merdeyî yo.”

Wazenê krîzî ser bigê

Sereka Pêroyina SYKPî Canan Yuce dîyar kerd ke demêko winayin de şaredarîyê HDPî ra tayînkerdişê qeyumî verdewamîya dişmenîya şarê Kurd a û wina domna: “Welat de dîyîşê Vîrûsê Koronayî ra nika aşkera bî ke sîstemê weşîye de kêmanî zaf ê, na rewş zî AKP tengî de veradano, tayînê qeyuman zî seba bedilnayişê rojdemî ameyê kerdiş.”

Torra paştdayişî ra mudaxale 

Sereka Pêroyina Partîya Şoreşkerî Elîf Oneren zî destnîşan kerd ke nika Tirkîya vera Vîrûsê Koronayî de girewtişê tedbîran yenê nîqaşkerdiş la belê newe ra destgirewtişê polîtîkayê qeyumî nîno qebulkerdiş û wina dewam kerd: “AKP cayê weşîya şarî şono qeyum tayîn keno. Şaredarîyan vera nêweşîya Koronayî xebat kerdinê la şaredarîyan hewna açarnayê qeraqolî ra.”

Hemsereka Pêroyina ESPî Ozlem Gumuştaş zî wina qedîna: “Qeyum, polîkayêko yewperest û faşizan o, şerêko taybet o. Wezîfeya şaredarîyan vera vîrûsê Koronayî şarî ra resnayişê awa pank, heqê weşî û kelmelê pankî yo la bi polîtîkayê qeyumî astengî vetê ke şar şaredarîyan ra xizmet nêgo.”

——————————————————————————————————

Nêrazîbîyayîşê xespkerdişê şaredarîyan

Platformê Kede û Demokrasîyî yê Amedî derheqê xespkerdişê şaredarîyanê HDPyî û destbendkerdişan de eşkerayîyêke daye. Eşkerayîye ame vatene ke AKPyî vîrusê Korona sey firsendêk dî û bi qeyûman şaredarîyê Êlih, Farqîn, Licê, Erxenî, Norşîn, Gêl, Xelfetî û Gokçebagî îşxal kerdî. Eşkerayîye de ame eşkerakerdene ke rojêka winasêne de destsernayîşê 8 şaredarîyan yeno manaya vilabîyayîşê vîrusê nêbîyayîşê demokrasîyêkê weşîye yê welatî.

Dewamê eşkerayîye de wina ame vatene: ”Destbendkerdişî zî yenê manaya mudaxeleyê cuya demokratîke û yenê manaya hêrişê heqê weçînayîşî, yenê manata hêrişê cuya komelkîye. Ma reyna venga hukmatî dane ke wa dişmenîya kurdan ra fek vera bido. Cade caardişanê Rewşa Îstîsnayîye û polîtîkayanê qeyûmî ra fek vera bido. Dest nêdo îradeyê şarî.” AMED