Qetilê Alanî ra 125 serrê ceza

Şerê mîyaxo yê Surîye û hêrişê çeteyê DAIŞî ra pey, serra 2015î de Kurdê Rojawanî nêçare koçê Tirkîya kerdê û ewta ra zî waştê bivîyarê Ewropa. No ser Behrê Egeyî de keşteya fîberî ra 14 Kurdê Rojawanî weniştî la belê keşteya înan behrî de deqelya bî.

Demê deqelyayişê keşteye, Zahîn Kurdî û domanê a 3 serra Galîp Kurdî û 2 serra Alan Kurdî, bi temamî 5 kesê cuya xo vînî kerdbî. Alan Kurdî peynî Dinya de bibî sembolê bextwaştoxan. Qetilê Alan Kurdî yê Cebraîl E., Ecevît  Bulent G. û Alî Can Ş. Edene de ameyê tepiştiş. Peynîya cipersayişê emnîyetî sewqê Dadgeha Ceza ya Bodrumî ra ameyê kerdiş. Peynîya dariznayişî qetilê Alan Kurdî ra bi îdiaya ‘Bi qestê merdimkiştişî’ 125 serrê ceza ame dayiş û cendirmeyan qetilan peynî berdê xepisxaneyê. MA/AMED