‘Serkewtîş do yê ma bo’

Seba 21ê Adare, rojanê Newroz mordnayîşê peynî destpa kerdî. Xêlê cayan de bimbarekînî roja Şeme bi meş û mitîngan destpa kerd. Awrûpa de zî Frankfûrt, Parîs, Stockholm û xêlê sûkan de Newroz bimbarek bî. 

Kurdistanijî û dostê ci yê ke Almanya de ciwîyenê, Şeme seba bimbarek kerdenê Newroz, sûka Frankfûrt de amey têhet. Nûmayîşa ke hetê NAV-DEM amê organîze kerden de hêrîşanê vera Şengal, dîktatoriya Erdogan û qedexeyanê Almanya rê nêrazîbîyayîş damûsnîya. Kurdê ke seatanê sodir de amey têhet, di perran ra, bi slogananê “Bijî Serok Apo”, „Bijî Newroz” û bi flamayanê YPG-YPJ, KCK, û posterê Ocalanî ke Almanya de amey qedexe kerden, ver bi meydanê mitîngî Europa -Alle rayşî. 

Bernameyê mitîngî bi Çerxa Şoreşê ke koroyê domanan yê TEV-ÇAND vate destpa kerd. Dima ra Hemserokanê NAV-DEMî Bahattîn Dogan û Fatoş Goksûngûr qisey kerdî, Newroza şarê kurd bimbarek kerdî û vera qedexe û zextan vengê têkoşînî day. 

  ‘Ma seba însanîyetî vera DAIŞ şer kenî

Hemserokê PYD Salîh Muslim ke qisey kerd, Almanya de qedexekerdîşê sembolanê kurdan rê nêrazîbîyayîş damûsna. Muslim’î va, yê ke bîrê qedexekerdîş ala û sembolê ma nê, ganî ala Tirkîye û yê terorîzmî bê. Salîh Muslim’î va, “Çike ma Rojhelatê Mîyanên de tenya seba xo nê, seba pêrokîn mordemî vera DAIŞ û terorîzmî şer kerd. Xoverdayîşê ma seba Ewrûpa, seba pêrokîn mordemîye bi. Ma nê qedexeyan şermezar kenê.” 

Muslim’î vist vîrî ke ewro her çî zaf zelal û akerde yo û wina va: “Newroza emserr her wextî ra cîya ya. Ma ewro her kesî silasnenê, dişmenanê xo, dostanê xo ma rind silasnenê. Dişmenê ma bîyê har, her hetî ra hêrişê ma kenê. La rixmê nê hêrîşan xoverdayîşeke gird esto. Wa kes meraq nêkero; serkewtîş do yê ma bo.” 

‘Cinî zerreyê xoverdayîşî de yê’

Ser nameyê Hereketa Cinîyanê Azad ê Ewropa zî Mûnevver Azîzoglû Bazan qisey kerd û aşkere kerd ke, rojê ke ma mîyan ra ravêrenê de hewcedarîye bi serewedartişî û xoverdayîşî esto. Bazan ard ziwan ke aşma Adare seba şarê Kurd zaf muhîm a û aşkere kerd ke meşaleya xoverdayîşî ke Kawa, Mazlûm Dogan, Zekîye Alkan, Rahşan Demîrel, Ronahî, Bêrîvan û Sema Yuce berz kerdî, ewro vera AKP û DAIŞ’î de her ca de veşena. 

Dima ra mesaja Ciwanên Azad amê wendîş û veng dîya gencan ke bi rihê Çîyager’an tekoşîn bîro dayen.

‘Erdogan’î bierzê sandiqî’ 

Hemserokê Partiya Herêmanê Demokratîk (DBP) Kamûran Yuksek zî tewrê bimbarekînan bi û qisey kerd. Yuksek’î hayr ant hêrîşanê AKP û dewleta Tirk ser û wina va: “Ma dê bi şîyara ‘Ya Azadî, Ya Azadî’ biresê azatîya xo. Na serr do bibo serra qedîyayîşê AKP. Şarê ma û şarê Tirkîyeyî dê sîstema yew kesî ke Erdogan wazeno bîyaro ra dê vajê ‘NÊ’. Wa selam bo Newroza ke Amed û Wanê de do bîro bimbarek kerdîş.” 

Ganî Kurdî bibê yewe

Hemserokê KNK Rêbwar Reşîd’î zî Newroz de qisey kerd û vengê têdûştî û têkoşîna pîyayî kerd. Reşîd’î aşkere kerd ke nê hêrîşê dişmenî damûsnenê ke, ê bi xo kewtê tengî û wina va: “Bi wesîleyê Newroz ganî Kurdî bibê yewe û vera dişmenanê xo têkoşîn bikerê.

Qisey û mesajan ra dima hunermend Mehmet Akbaş, Cevdet Mervanî, Koroya Domanan ê TEV-ÇAND’î, Nûarîn, Koma Newa Kurd, Tahsîn Xidir zî vejyay sehne û bi deyranê xo coş day tewrbîyayoxan. 

Stockholm de Newroz

Paytexta Swêd Stockholm de zî Newroz roja Şeme bimbarek bî.  

Bi hezaran Kurdistanijan ra pîya, temsîlkaranê partî û rêxistinanê Swêd, Kurd, Asurî-Suryanî ke tewrê bimbarekînan bî. Bimbarekîna ke Solnahallen de virazîya de polîtîkayanê qirkerdişî yê Erdogan û AKP rê nêrazîbîyayîşî damûsnay.  Parlementerê HDP Faysal Sariyildiz û Hemserokê PYD Salîh Muslimî ke bimbarekîn de qisey kerdî zî vera faşîzmî vengê berzkerdîşê têkoşînî day.  

Herzewbîn Awûstûrya, Îtalya, Danîmarka, Îngilîstan, Swîsre de zî newroz bimbarek bî. 

 FRANKFÛRT / STOCKHOLM