Sivîlê TRTyî cergê DAÎŞî bi

BÊRÎTAN SARYA

ANF/QAMIŞLO

Mustafa El Zîbo yo ke taxa El Şelalî ya Girê Sipî ra yo bi nameyê Ebû Reşîd yeno şinasnayene. Mustafa El Zîbo yo ke îdarekaranê Taburê Şêx El Îslam Bîn Tîmîya bi serra 2013î de tewrê Cephet El Nusra bi. Mustafa El Zîbo temmuza 2013î de bi hawayêkê aktîfî tewrê karê surgunkerdişê kurdan ê Girê Sipî ra bi û dest na keyeyan ser. Tay kurdî zî ê çax hetê Mustafa Zîboyî ra ameyî qetilkerdene.

Mustafa Zîbo hezîrana 2015î de wexto ke Gîrê Sipî hetê QSDyî ta ameye xelisnayene rema Tirkîya û tewrê Artêşa Sûrîyeya Azade bi. 10ê gulana 2019î de ekrananê TRTyî ser o sey sivîlêk ame mojnayene û bi rayîrê TRTyî îdîa kerd ke YPGyî o û erebî bi zorî erdê înan ra vetî. Cergê DAÎŞî Casim El Reşo zî Serêkanîyê de mîyanê cerganê SMOyî de ca gêno. El Reşo serra 2014î de tewrê DAÎŞî bi û bi sercerg. El Reşoyî şarê kurdî qir kerd û serra 2015î de rema Reqa. El Reşo mesuldarê remnayîş û rotişê cinîyanê êzidîyan bi. Cinîyanê ke dima xelisîyayî vat ke El Reşoyî îşkence bi nînan kerd.

Wextê Hemleya Xezabê Firatî ya QSDyî de El Reşo Reqa ra rema Şehba. Uca de koma cerganê bi nameyê Ehrar El Reşo awan kerd. Cerganê xo reyde tewrê îşxalê Serêkanîyê bi û agêra şaristan. Reşoyî 24ê teşrîna peyêna 2019î de cergê DAÎŞî yê zîndanê Mebrûka vera dayî. Cergo bîn ê DAÎŞî Welî Ebdulezîz (Ebû Herîb El Becarî) dewa Xêbîşî ya Til Temirî ra yo û sercergê El Nûsra yê Serêkanîyê bi. Dima ke El Nûsra hetê YPGyî ra ame çinkerdene ey zî Serêkanîyê terikna. Serra 2015î de tewrê DAÎŞî bi û dima ke birîndar bi derbazê Riha bi û Riha de ame weşkerdene. Wexto ke dewleta tirke 9ê teşrîna verêna 2019î de Serêkanîyê îşxal kerd Ebdulezîz zî sey endamêkê SMO tewrê îşxalî bi. Nika Serêkanîyê de goreyê wezîfeyê xo dest nano malanê kurdan ser.

Ramî Yusuf El Dehîş taxa Eyn Arusî ya Girê Sipî ra yo. Arus tewrê qirkerdişanê kurdan bi û îstîxbaratê DAÎŞî de xebitîya. Xelisnayîşê Girê Sipî ra dima Arus rema Kanîya Xezalan û seba îstîxbaratê tirkî xebitîya. El Dehîş terefê MSOyî de 9ê teşrîna verêne de tewrê îşxalê Girê Sipî bi. Nika zî Girê Sipî de sey sercergêk xebitîyeno.