Tirkîya bi hawayo çetekî yena îdare kerdene

OZGUR PAKSOY / MEHMET ŞAH ORUÇ / MA / AMED

2  rojî verê polîsan 9 bajaran de eştbî keyeyan ser û bi seyan kesî tepiştbî. Mîyanê kesê ke ameybî tepiştene de 7 endamê Dîvanê Hemserekîya Kongreya Komelê Demkratîke (KCD) zî estbî. Polîsan berê awanîyî şikitbî û zere talan kerdbî.

Hemserekê KCDyî Berdan Ozturkî babete ser o qisey kerd. Ozturkî dîyar kerd ke bi raybazanê tehdît, şantaj, polîs û leşkeran Tirkîya îdare kenî û no zî nîşan dano ke îqtîdar xo qedênayo. Ozturkî va ‘nê operasyonî newe nîyî’ û wina domna: “Demêko derg o ke nê operasyonî yenî kerdene. 3 serrî yo ke vera dezgehanê KCD, HDP û TJA de operasyonî estî. Îdareyê faşîstî yê AKP û MHPyî hewl dano îradeya kurdan çin bikero.”

Ozturkî va ‘adara 2019î de do weçînayîşê herêmî bêrî viraştene’ û wina dewam kerd: “Bi nê operasyonan wazenî şarî bitersnî. Weçînayîşê herêmî seba ma zaf muhîm î. Wexto ke merdim weçînayîşanê 7ê hezîrane, 1ê teşrîna peyêne û 24ê hezîrane ra biewnîyo, vîneno ke îradeya şarê ma orte de ya. Şarê ma do xoverdayîşê xo bidomno. Her vatişê Erdoganî sey talîmatî yeno dîyayene. Yê ke Erdogan nîşan dano, yenî tepiştene. Ê se bikerî zî ma do bikewî weçînayîşan. Ê bi hawayo çetekî welatî îdare kenî. No zî nîşan dano ê êdî qedîyayî. Problemê kurdî ancax bi sîyaseto demokratîk û muzakere çareser beno. Rayberê Şarê Kurdî Abdullah Ocalanî ser o tecrîdêko giran esto. Tecrîd bi şaranê Tirkîya dano vînî kerdene. Ma do heta peynî sîyasetê demokratîke de israr bikerî.”