Wa heme hepsîyan bêrê veradayiş

Sazîyê elewîyê bi hembar vatî ke Tirkîya de kapasîteya hepisxaneyan qet bi qet a, bi na rewşe hepisxaneyan de vilabîyayişê Vîrûsê Koronayî hîna bi rehet o. Ganî heme hepsîyan bêcîyakarî bêrê serbestveradayiş.

Federasyonê Yewîya Elewî yê Ewropaye, Komelê Kultirî yê Elewîye, Komelê Elewîyê Demokratîke, Fedarasyonê Elewî Bektaşîyî, Fedarasyonê Komelê Elewîye, Fedarasyonê Weqfê Elewîye, Weqfa Haci Bektaş Velîyî û Komela Kultirî ya Pîr Sultan Abdalî seba vilabîyayişê Vîrûsê Koronayî ser o aşkerayêka bi hembar dayê.

Aşkera de rewşa hepisxaneyan ra bal ame antiş û wina ame vatiş: “Kesê ke bi rêxistinî domanê ma rê tiryak roşenê, kesê ke cenîyan ra hêrişê zayendî kenê, kesê ke cenîyan qetil kenê serbestveradayişê înan nîno qebulkerdiş. Nika Vîrûsê Koronayî pêroyina Dinya de vila beno, Tirkîya de zî kapasîteya hepisxaneyan qet bi qet a, bi na rewşe hepisxaneyan de vilabîyayişê Vîrûsê Koronayî hîna bi rehet o. Ganî heme hepsîyan bêcîyakarî bêrê serbestveradayiş.”

Her cayê de paştdayişê yewbînan

Komela Elewî ya Demokratîke (DAD) zî seba Vîrûsê Koronayî ser o aşkeraya bi nuşte da û aşkera de ame dîyar kerdiş ke pêroyina Dinya Vîrûsê Koronayî ser perişan bîya û aşkera wina domna : “Ma merdiman ganî heqîqetî bipawê, îqtîdarê nefsanî heme bê çareserîyê xo werte de yê. Vîrûsê Koronayî, argamanê şerê bîopolîtîkî yo ke sîstemê kapîtalîst xo newe ra înşa biko. Heme rasteyê heselî yê xozaye, heme faîlîyetê hegayî, rasteyê herre û awe destê şîrketan do biko. Peynî zî organîzasyonê nufisî bêro kerdiş. No ser ma her rasteyê de ganî yewbînan ra paştdayişê sey avzelêk bivînê.” MA/DÊRSIM

————————————————————————————————————————————

Tirkîya de rewş cidî ya

Komîsero Berz ê Heqanê Merdiman ê Neteweyê Yewbîyayeyî (NY) Michelle Bacheletî veng da ke wa pêroyîya dinya de tepişteyî cade bêrê veradayene. Bacheletî vat ganî hukmatî û selahîyetdarî lazabez bigureyê ke hûmara kesanê ke zîndanan de yê bêre kêmkerdene. Bacheletî sey nimûne waşt extîyarî û nêweşî û êyê ke sûcê girdî nêkerdî bêrê veradayene.

Wezîrîya Edaletî yê Fransa semedê vejîyayîşê 5-6 hezar tepişteyan gureyena. Fransa de zîndanê ke kapasîteya ci  61 hezar o de 70 hezarî ra zêdêr kesî estê. Bitaybetî welatanê sey Tirkîya û Sûrîye de rewşe cîdîya. Rêxistina Çimdarî ya Heqanê Merdiman HRWyî hîşyar kerd ke eke zîndananê Sûrîye de têna kesêk/e de jan vejîyo felakete bena. Tirkîya de pêro pîya 366 zîndanî estî û kapasîteya înan hendê 233 hezar kesan a la hûmara kesanê ke zîndanan de yê 300 hezarî ra zafêr a. Bi vatişê bînî 70 hezar kesî kapasîte ra zaf ê. Coka Korona semedê zîndanan sey tehdîtê girdî yena destgirewene û qesaweto gird esto ke netîceya ci felakete bo.