Wa hukmatê Başûrî nêvajo qey eşkeno bimano

FERHAT ÇELÎK / MA/STENBOL

Pisporê Rojhelatê Mîyanênî Faîk Bûlûtî derheqê hêrişê dewleta tirkî yê vera Başûrê Kurdîstanî de qisey kerd, hişyarîyê muhîmî kerdî.

Bûlûtî va ‘Tirkîyaya ke xeta Mûsil, Kerkûk û Helebî çarçewaya sînoranê mîsaki millî de vînena, hertim wazena na xete binê kontrolê xo de bitepişa’ û wina domna: “Tirkîya bi OSO û sewbîna çeteyan hewl dana Idlib, Heleb û sewbîna cayanê Sûrîye girêdayîya xo bikero. Reyna hewl dana bi tersnayîşê Berhem Salih û Neçîrvan Barzanîyî îdareyê ewja zî xo ra besto. Tirkîya bi no hewa hewl dana îdareyê ewja mecbûrê xo bikero. Goreyê mi no parçeyê planêko hîra yo û hêdî hêdî erzîyeno dewre.”

Bûlûtî qiseykerdişê xo de qala nizdîbîyayîşê Îranî zî kerde û wina va: “Eke merdim bi hayîdarî biewnîyo, vîneno ke Îran verê cu nê operasyonî rê vatbi ya, labelê dima ra fek ti ra verada. Na reye Tirkîya bi tena sereyê xo waşte operasyonan virazo. Çimkî Îran nêwazeno ke Kurdî hetê Tirkîya de ca bigîrî.”

Vano qey o do bimano

Bûlûtî qala operasyonê Xakurkê kerde û wina va: “Hukmatê Başûrê Kurdîstanî vera nê operasyonî de vengê xo nêkerd. No zî nîşan dano ke teslîmê Tirkîya bîyo. Meseleya Kerkûkî de Tirkîya bere sînorî yê Xabûrî pada. Ewja de tayê manevrayî zî kerdî. Bi no hewa Îdareyê Başûrî ame teslîmgirewtene. Îdareyê Başûrî her çî bi çarçewaya menfîetî de gêno dest û wina nizdî beno. Nê rojan de pêvînayîşê Berhem Salih û Neçîrvan Barzanîyî bi Tirkîya reyde bî. No zî nîşan dano ke operasyon de hukmatê Başûrî destek nêdo zî, vengê xo nêkeno û çimanê xo padano. Vano qey o do bimano. Wa ê baş bizanî. Tirkîya Efrîn ra dima game bi game Başûr zî gêno xo dest. Eke Tirkîya tevgerê Kurdan nêmano, wa nêvajî qey ê do payan ser o bimanî.”