Wayîrê têkoşînê 22 serran: Guzel Şahîne

Dayîkanê Şemeye ra Guzel Şahîne çend rojî berê wefat kerde. Dayîka Guzel Şahîne pey xo de têkoşînê xo yê 22 serran verdaye. Seke yeno zanayîş Dayîka Guzel 22 serrî yo ke Rasteyê Galatasarayî de xover dayêne û her tim bi vatişê ‘Her domano ke yeno vînîkerdene, domanê min o zî’ piştî dayêne çalakîya vînîbîyayeyan.

Dayîka Guzele serra 1943î de qezaya Pîlemurîye ya Dêrsimî de ameya dinya û 12 serreyîya xo de ameya zewijnayîş. Herçiqas seba ke hîna domanîya xo de yena zewejnayîş, reyna zî têkoşînê xo bi hawayo bêmaben domnena. Serra 1960î de problemê ekonomîkî ver bar kena û yena Stenbol de Taxa Gulsuyu de bica bena. Herçiqas ke rewşa aye ya ekonomîk baş nîyo, reyna zî berê xo tim şorişgêran rê akena. No keye de 5 domanan pîl kena û hemînan zî goreyê cuya ke şorişgêran ra musaya, pîl kena. Şahîne aye roje ra nata her tim vera zext û neheqîyan de xover dana û qet fek xoverdayîşê xo ra veranêdana.

Dayîka Şahîne eşnawena ke 27ê Gulana 1995î de do seba perskerdişê aqûbetê vînîbîyayeyan Dayîkê Şemeye Rasteyê Galatasarayî de çalakîye bivirazî. O wext qet guman nêkena û şona, beşdarê çalakîye bena. Aye roje ra nata Dayîka Şahîne her hewte roja şeme, seba ke şêro Rasteyê Galatasarayî, keyeyê xo yo Gulsuyu de yo ra vejîyena û beşdarê çalakîye bena. Bi no hawa 22 serrî bêmaben destek dana têkoşînî. Dayîka Şahîne her domanî sey lajê xo vînena. Dayîka Şahîne 20ê êlule de wexto ke nêweşxane de tedawî dîyêne, wefat kerd. 

 

Her şorişgêr domanê aye bî

Veyveka Dayîka Şahîne Çîgdem Şahîne zî bi desan reyan Dayîka Şahîne reyde têkoşîn daya û ameya tepiştiş. Çîgdem Şahîne zî qala cuye û vîrardişanê Dayîka Şahîne kerde û wina va: “Serra 1996î de zîndanan de seba ke tay heqî bêrî girewtiş, çalakîye dîyaybî destpêkerdiş û seba nêyî zî çalakîya rojeyê mergî ya 52 rojan estbî. Dayîka Şahîne zî seba ke piştî bido çalakîye beşdarê na çalakîye bîybî. O wext seba ke çalakîye hîna hîra biba û destekî zêde bibî, munaqeşeyî ameyênê kerdiş. Dayîka mi zî o wext vatbî ‘ê domanê min î, heta ke ê vêşan bî, ez nêşena bi hawayo mirdî rakewa’ û qet guman nêkerdbî û dest bi grevî kerdbî. Dayîka mi herkesî rê qala têkoşîn û xoverdayîşî kerdêne. Wexto ke aye çalakîye bi serkewtiş netîce bîye, tewr zaf zî dayîka mi kêfweş bîye. Lajê aye rojeyê mergî de nêbî. Seba dayîka mi, her şorişgêr domanê aye bî.” 


MA – STENBOL