Wesayîto zirxinî da domanî ro

Demê peyênan de hetê dewlete ra konseptêko newe yê qetilkerdişê kurdan erzîyayo dewre; o zî bi wesayîtê zirxinan qetilkerdiş o û hedîseyî sey qezayê trafîkî yenî şinasekerdiş û kerdoxî nînî mehkemekerdiş. Nê hedîseyan ra yewe zî vizêr saetanê nîmeroje de qezaya Hezexî ya Şirnexî de Taxa Aşagi de ame cuyayîş.  Wesayîto ke hetê polîsanê sîvîlan ra ameyêne ramitiş, da doman Umut O.yo 4 serreyî ke keyeyê xo ver de kay kerdêne ro. Netîceyê pirodayîşê wesayîtî de doman binê wesayîtî de mend û bi hawayo giran birîndar bî. Doman wedarîya nêweşxaneyê qeza. Badê ke tîya de mudaxaleyo sifteyîn ame kerdiş, tîya ra sewqê nêweşxaneyêko taybet ke Êlih de yo bî û ewja de yeno tedawîkerdiş. 

Umut nika beşa lezgîne de maneno û ame musayîş ke hîna tehlukeyê mergî derbaz nêkerdo. 

MA / ŞIRNEX